Disgyblion Ysgol Godre’r Berwyn yn Pweru’r Dyfodol

Disgyblion lleol yn camu i rôl arloeswyr ynni adnewyddadwy, gan gael cipolwg ar heriau peirianneg wrth gystadlu i adeiladu’r model tyrbin gorau

Mae’r tîm o Coriolis Energy, datblygwr ynni adnewyddadwy, wedi bod yn annog disgyblion yn Ysgol Godre’r Berwyn yn y Bala i gymryd rhan mewn her beirianneg wrth iddynt gwblhau eu cynlluniau ar gyfer Fferm Wynt Foel Fach i’r gogledd o’r dref.

Fel rhan o’r ymgynghoriad cyn-ymgeisio cyn cyflwyno’r cynllun i’r broses gynllunio, cynhaliwyd tri digwyddiad cyhoeddus yng Nghwmtirmynach, y Bala a’r Sarnau, lle mynychodd tua 150 o bobl.

Os caiff ei gymeradwyo, gallai’r prosiect 72 MW, 10 tyrbin hwn gynhyrchu digon o drydan glân i bweru dros 68,700 o gartrefi cyffredin bob blwyddyn*.

Roedd rhan graidd o’r ymgysylltiad cymunedol yn cynnwys ymweld ag Ysgol Godre’r Berwyn, lle cymerodd disgyblion ran mewn sesiynau rhyngweithiol yn trafod ynni adnewyddadwy, ei fanteision, a’i botensial ar gyfer yr ardal leol a’r heriau i’w hystyried wrth gynnig fferm wynt.

Mae Ysgol Godre’r Berwyn yn gwasanaethu cymuned gerllaw safle’r fferm wynt arfaethedig, ac yn ystod ymweliad Coriolis, cymerodd y plant ran mewn cyfres o weithgareddau hwyliog a rhyngweithiol a gynlluniwyd i ennyn chwilfrydedd ynghylch ynni adnewyddadwy.

Cymerodd mwy na 60 o ddisgyblion ran yn frwdfrydig mewn gweithgareddau ymarferol a gynlluniwyd i ddangos yr egwyddorion peirianneg y tu ôl i sut mae tyrbinau gwynt yn gweithredu. Gan weithio mewn timau o ‘beirianwyr’, a defnyddio cardfwrdd wedi’i ailgylchu a deunyddiau eraill, buont yn adeiladu modelau tyrbin bach a mawr oedd yn gweithio.

Mynychodd pobl ifanc o Flynyddoedd 6 i 10 hefyd y digwyddiad ymgynghori yng Nghanolfan Henblas, y Bala, lle buont yn archwilio deunyddiau addysgol, cwblhau llyfr gwaith gweithgareddau, a siarad â thîm y prosiect.

Ymgasglodd y disgyblion o amgylch y model 3D o’r fferm wynt, yn llawn cyffro i weld eu cartrefi ar y map. Roedd hyn yn caniatáu iddynt ddelweddu sut y byddai’r prosiect yn edrych o ble roeddent yn byw, eu hysgol, a golygfannau allweddol yn y dref.

Dywedodd Louise Housecroft, Rheolwr Prosiect Coriolis Energy:

“Mae ymgysylltu â phobl ifanc yn yr ardal yn hanfodol, nid yn unig i’w helpu i ddeall posibiliadau ynni gwyrdd, ond hefyd i sicrhau bod ganddyn nhw lais wrth lunio’r prosiect.

“Rydyn ni’n croesawu pob persbectif, syniad ac adborth wrth i ni weithio i wneud y gorau o fuddion y cynllun hwn.”

“Gofynnodd dysgwyr o Ysgol Godre’r Berwyn gwestiynau gwych i ni, roedden nhw’n frwdfrydig yn eu hadborth am y prosiect, ac yn ymddiddori mewn rhagolygon gyrfa yn y dyfodol yn y sector ynni.”

Mynychodd Mantell Gwynedd, a fydd yn gweinyddu’r Gronfa Budd Cymunedol sy’n gysylltiedig â’r prosiect, y digwyddiadau hefyd i siarad â disgyblion am sut yr hoffent i gyllid yn y dyfodol gael ei ddefnyddio. Roedd eu syniadau diddiwedd yn amrywio o siopau a chyfleusterau chwaraeon newydd i drac pwmp beiciau a siop losin!

Drwy gydol yr ymgysylltiad, cafodd disgyblion gyfle i leisio eu barn am y cynllun, ehangu eu dealltwriaeth a gofyn cwestiynau am ynni adnewyddadwy a thu hwnt.
Mae’r ymgynghoriad cyn-ymgeisio ar gyfer Fferm Wynt Foel Fach yn rhedeg tan ddydd Llun 9 Chwefror, gyda rhagor o wybodaeth, gan gynnwys cyfleoedd i roi adborth, ar gael ar-lein yn www.foelfach.cymru.